ON sáhttá nannet sámiid rivttiid

Odne geige ON:a raporteavra James Anaya raporttastis sámiid birra ON:a Olmmošvuoigatvuođaráđđái Genevas.Raporttas leat ávžžuhusat davviriikkaide movt buoridit bargguideaset sámi áššiin. Sámiráđi olmmošvuoigatvuođa áššedovdi Mattias Åhrén vuordá ahte raportta dohkkehuvvo ja ahte davviriikkat čuovvot ávžžuhusaid

Mattias Åhrén dadjá ahte raporta lea stuorimus ja deháleamos guorahallan maid ON lea ráhkadan sámiid birra. Raporttas čállá ON:a sierra rapporteavra olmmošvuoigatvuođa áššiin James Anaya earret eará ahte Norga ferte sihkkarastit mearrasámiide guolastanrivttiid.

Muđui lea earenoamáš garra moaitámušat Ruoŧa ja Suoma vuostá. Ruoŧa ferte addit Sámediggái eanet iešmearridanválddi. Suopma fas ferte buoret suddjet sámi eanavuoigatvuođaid ja maid nannet sámi boazodoalu.

Ruoŧas ferte stáhta vel sihkkarastit čearuide ruđalaš veahki go šaddet lágastallat eanaeaiggádiid vuostá, čállá Anaya.

Anaya meidne maiddái ahte visot riikkat fertejit buhttet boazoeaiggádiid vahágiid maid meahcieallit dagahit ja ahte meahcieallilohku ferte leahkit dakkár dásis ahte ii uhkit boazodoalu. Anaya ávžžuha vel stáhtaid duppálastit návccaid ealáskahttindihte sámegiela ja nannet sámegieloahpahusaid.

James Anaya almmuhii raporttastis juo ođđajagemánus ja dal lea oaidnimis dohkkeha go ON:a olmmošvuoigatvuođaráđđi raportta nu got lea - dehe šaddet go rievdadusat.

Mattias Åhrén sávvá dan dohkkehuvvot dálá hámis ja dohkkeheapmi mielddisbuktá stuorit gáibádusa stáhtaide čuovvut raportta ávžžuhusaid, dadjá Mattias Åhrén.